Marco
Position: Chairperson
而家諗返Prep Pro P已經係4個月前嘅事，搬紙皮、珍珠板，有血有淚更有數不盡嘅感謝，而家仲有幾十塊喺自己間房度做遮光板”Virtual Background”，淨低咁多全因為冇咗面對面Pro P。
老實講，我覺得真係好可惜，準備，過程，成果，我哋只有第一步，先不論洗咗幾多錢訂Souven買材料整Dec, 準備咗一個月，果陣期待之後Chanting，每日成隻喪屍咁去Yo Member，通宵開完Forum之後直落開Count…腦海中已有所有想像，一切一切都會係成個Ulife青春熱血嘅難忘回憶，但邊個諗到等緊我哋嘅係接下來足足一個月嘅Online Pro P，所有嘢都嚟得好突然，邊個諗到個病毒會搞到而家咁大件事。一月去到三月，我覺得呢兩個月唔會輕鬆過面對面好多，除非我哋冇Prep過面對面Pro P.
Online Pro P個互動無論如何都比不上面對面，有啲一生人一次冇咗真係可惜，只能夠祈求肺炎速速退散，咁就未至於連Ocamp都搞唔到啦。
如果唔係間中有Member甚至有啲Grad咗嘅老鬼鼓勵我哋都真係頂唔住架，同埋冇上莊s嘅意見、幫忙好多我哋都會唔識做，當然最重要係我嘅莊員，我會繼續努力做好呢個位！
Zoe
Position: Internal Vice-Chairperson
對於Pro P我嘅感覺其實都幾複雜，全件事其實都幾亂同埋幾攰。
今年Pro P可以話表面睇落唔係幾順利，分左兩個階段，一個系實質系學校做野，一個系online做野。第一個階段其實我冇點參與...冇辦法，阿媽入院，佢大曬！到得閒D可以幫手嘅時候又宣布Pro P 形式要轉Online 。果時其實幾嬲，好似比人收走左張Pro P體驗卡錦。
如果話不幸中嘅萬幸就係我地Pro P延長左。為左補翻Pro P我地唔系以面對面見members嘅缺點，我地一齊諗左好多方法，比如搞抽獎、寫多D story、拍宣傳片等等去接觸members，不過我覺得都比唔上one day takeover.。
我總共去左兩次 One day take over ，負責出下PO，影下相錦。雖然中間出左我好多黑圖，不過兩次活動我都感受到同莊員之間嘅聯繫深左。如果要話系Pro P搵個我最有印象、最深刻嘅活動，應該就係one day take over 啦。
總結離講我覺得我地Pro P其實真係好成功，雖然一開始進度慢左，潛左下水，但我好開心見到同莊員共同努力嘅成果。多謝曬大家😘
C 頭
Position: External Vice-Chairperson
Edda
Position: Internal and External Secretary
今年嘅Pro P形式可能對咁多位member嚟講都有啲陌生，而對我地Spectrum嚟講都係一個挑戰。Pro P係我哋搞嘅第一個event，大家之前一齊辛辛苦苦準備正常Pro P嘅野，到收到消息要轉成online嘅形式嚟promo，難免有失落同埋迷惘，因為之前嘅心血浪費曬，同埋始終冇太多歷屆嘅經驗可以參考。一開始都冇乜方向可以點樣promo，但係大家之後都重整旗鼓，盡量去諗下用唔同嘅方法同member接觸同互動，自問自己唔係好有創意嘅人，藝術細胞就更加係0…但感激一班莊員們都肯carry我，大家都盡自己能力去幫手，我覺得雖然今年嘅Pro P可能未及歷屆可以喺counter面對面同其他人promo咁吸引，但我地自己嘅得著就有過之而無不及，以我自己為例，就喺Pro P最後就邊學邊做咁剪咗一條片，除此之外亦都因為我地要一齊從0去構思成個Pro P同埋礙於疫情，莊內溝通上遇到嘅問題都令我自己有唔少嘅得著。最後當然要感激各位喺Spectrum online Pro P期間嘅支持啦，希望嚟緊一年喺各種因素嘅限制之下都可以為member帶嚟既豐富又有意義嘅一年啦！
今次Pro P分為兩部分，第一部分為傳統Pro P。因為之前學校停課嘅原因，導致今年上莊時間延遲，留俾我哋做準備嘅時間都相對縮減，加之Pro P的準備時間橫跨咗春節，因此喺人手同訂貨方面都遇到咗困難。但因為大家嘅共同努力都成功克服。除此之外，在準備時間，我哋成功完成左幾個遊戲嘅設計同製作，雖然冇辦法係Pro P期間俾大家體驗，有少少遺憾，但相信佢哋喺之後嘅活動都會同大家見面！
第二部分為Online Pro P。因為病毒嘅原因導致Pro P轉為Online Pro P，雖然一開始大家都好迷，唔知道應該點算好，但慢慢都搵返節奏，開始上手，係IG同FB用唔同嘅方式增加同members嘅互動，例如one-day-take-over、抽獎、吹水台等等，盡量使members更加瞭解我哋。
雖然今年轉咗做Online Pro P，失去咗chanting、sit counter、同members一齊玩遊戲嘅機會，但係Online Pro P都帶黎咗唔同嘅體驗，算係有得有失。今次特別嘅Pro P將會成為我寶貴嘅回憶。
Kingsley
Position: Financial Secretary
Alina
Position: Promotion Secretary
Pro p一開始要準備嘅嘢超級多，有嘅時間亦極少。係一月嗰陣好似返工咁，每日朝早返到學校就開始做嘢，除咗食飯就一直做到夜晚，有hall嗰時甚至會做到凌晨4至5點鐘。呢個過程無錯的確好辛苦，但同時亦有好多得着。我從來無試過將人地唔要嘅珍珠板轉化成遊戲同裝飾，之前都甚少有參與過設計遊戲同裝飾呢方面嘅活動，所以呢次準備過程對我嚟講其實好有趣，係當中我亦都學咗唔少嘢。除此之外，係每完成一個遊戲嘅時候，心入面嗰種滿足感都係難以形容，尤其係完成花咗好多位莊員嘅心血先完成到嘅卡比迷宮同彈珠台。但最重要嘅係整個過程入面，我都唔係自己一個，而係咁多位莊員一齊努力、一齊呻好攰、一齊食飯、一齊玩、一齊笑，淨係呢一樣嘢幾辛苦都係值得嘅。
之後一月未完，疫情就殺到埋身，係迫於無奈嘅情況吓只能喺網上嘅平台同咁多位members接觸，有好多準備好嘅嘢都畀唔到大家睇同玩，係非常令人失望同可惜，甚至沮喪。但我好慶幸認識到呢班莊員，係整個online Pro P都好落力，即使遇到幾多阻滯同未如理想嘅情況，都會迎難而上，並無因為promotion嘅形式突然改變而氣餒放棄，順利完成整個online promotion。
最後非常感激各位member同followers係promotion period期間嘅支持。
成日聽人講科大讀書好chur，我就話上莊仲chur，尤其係今年轉咗online Pro P，Well真係好深刻。
仲記得一月份係common 5+6 prep Pro P嗰陣，冇諗過真係有咁多嘢要設計，重覆戒珍珠板黐banner膠，真係有諗過話不如算啦，不過望到班莊員，冇hall嘅10點仲唔走 每次夠鐘食飯，都會話做埋先，突然間好有動力去做嘢。
係新年假前，我哋先話過進度好慢，Common開返就要chur盡，點知天有不測之風雲，撞正武漢肺炎，前一晚仲漏夜傾大dec，第二日就收到email話Pro P取消。Well，轉左online Pro P頭一兩個禮拜，我會話我哋都處於一個懵盛盛嘅狀態，完全唔知應該做咩，摸索咗一陣，我哋由一開始嘅淨係出post同story，慢慢咁加多咗好多唔同function: 小劇場、Q&A、陪你傾、IG決定我哋嘅一日，仲有最後嘅宣傳片。
好多謝班fitttt爆莊員，咁落力幫手做唔同嘅嘢，雖然我哋肺炎之後少咗見面，開會都用zoom開，不過我都相信我哋好firm，接下來都會越嚟越firm，我話嘅。
雖然我哋冇咗真正面對面嘅Pro P，冇得開counter見member，又或者係atrium chanting，有啲人話我哋少咗好多經歷，不過我會話我哋多咗好多佢哋未有過嘅經歷，如果你問我上莊為咩，坦白講我上莊之前冇諗過咁多，而家我就會答你上莊令我識到一班好熱血玩得又chur得嘅莊員，咁仲唔夠咩。
Daniel
Position: Promotion Secretary
Marvis
Position: Marketing Secretary
原來眨下眼就已經四月。諗返起最初嗰時都猶豫過上唔上莊好，一方面驚會太chur平衡唔到讀書；但另一方面又想挑戰下自己，試下以前冇機會做嘅嘢。事實證明，上莊真係比我想像中仲要chur好多；但可以識到一班唔同嘅莊員一齊咁落力去做嘢，呢種感覺又真係幾難去形容。
仲記得一開始要去唔同展會到R紙皮同珍珠板，跑完成個會場都搵唔到好多， 都幾擔心會玩唔夠整Pro P啲嘢。好彩後尾有幾間攤位願意畀不特止，仲叫我哋去攞埋佢哋鋪頭用剩嘅珍珠版，簡直就好似奇蹟咁。跟住落嚟就係無限loop嘅OT，幾乎晚晚都係我哋最遲先走，間唔中做完肚餓就會走出去大埔仔食宵夜，仲有晚無端端走之前喺common到練chanting，認真懷疑我哋成班人係咪做嘢做到癲咗，但嗰種感覺又真係幾過癮。
只不過今年真係多災多難。11月中先停完課，點知又彈左個武漢肺炎出嚟，搞到成個Pro P都冇得係Atrium搞，個幾月以來嘅心血就咁白費哂。少咗唔同嘅攤位遊戲， 我哋Online Pro P都要重新諗過用咩方法去宣傳。不過多得一班fit爆嘅莊員，我哋先可以諗到吹水台、小劇場，甚至澳門香港一日遊咁多活動同我哋嘅member互動，最後成功過埋polling。我諗唯一遺憾嘅就係冇辦法體驗到實體Pro P嘅熱血啦。
嚟緊一年固然會更加艱辛，存在嘅變數亦都唔會少，但有呢班咁做得嘢、咁warm嘅莊員一齊互相扶持，我諗無論點都可以搵到解決方法嘅。或者我哋可能真係體會唔到以往上莊嘅經歷啦，但邊個又可以斷定我哋唔會行出一條新嘅路呢？
「我們到底在追求些什麼，為何一直不斷往前衝」。
距離Pro P嘅結束，已經整整一個月。
由12月尾起，到各個展覽搵珍珠板、紙皮，求玩具、問Sponsor，試過無數次被Reject，再硬住頭皮繼續逐間去問。
到1月，日日早10晚12甚至通宵，勤力過返工咁喺Common砌Dec整Games，為嘅可能係希望派上用場一刻嘅嗰份完美。做野做到餓，明明樓下就係Seafront，大家都係會去爭住食嗰罐蛋卷，四五個人分嗰一條蛋卷。
再到2月初，面對face2face Pro P取消嘅消息，當中除咗可惜呢一個月以嚟嘅心血付諸流水，更多嘅其實係徬徨。
Online Pro P嘅日子，成日諗住點樣先可以吸引到Members，諗好多唔同嘅節目增加互動性，但始終隔住個Mon，總覺得成件事好唔真實。由零去到各個Promotion Events，有時候會諗自己做緊嘅野係咪真係足夠，有冇地方可以做得更好。
迷過沮喪過，但慢慢，推出嘅節目開始得到Members嘅回響，知道有人欣賞我哋嘅付出。當下聽到其實幾感動，起碼大家一直以嚟做嘅野冇白白浪費，哪怕只係嗰一小撮。
諗番轉頭，其實Pro P嘅心血從來冇白費過，因為正正有呢段咁獨特嘅經歷，先至令到原本互不相識嘅我哋走得更近。正因為有佢哋，我先更加認識我自己。當做野做到倦，抬頭一望，就會發覺並唔係得自己一個，起碼仲有一班莊員陪我熬更抵夜，爆肝出Dec出Games出Events，再辛苦嘅日子都變得值得。
未來一年嘅莊期，相信仲會有唔少挑戰，但願能夠一一克服，用更好嘅一面展示俾大家睇。
Antony
Position: Publication Secretary
成日上莊都同我講Pro P好辛苦，我嗰陣時仲未有概念，抱着想學嘢嘅念頭就成為左nom-cabinet，覺得大學嘅社團辛苦得去邊。
然後pro p preparation 開始，我發現係真係要由零開始，所有資源都係要自己去R，去計，所有遊戲都係自己設計自己整，仲要時時刻刻計住條數，買嘢都唔敢買太多。去到後期真係趕工基本上每日都要做到凌晨一兩點。但係我哋都頂住壓力將佢做完！
然後疫情就摧毁咗我哋幾乎全部嘅努力，轉咗做online Pro P呢種前所未有嘅宣傳模式，我哋只可以靠自己摸索，喺社交平台ig 同fb做各種精彩嘅活動試圖要達到正常Pro P嘅效果，當然結果係差強人意，Polling 啱啱好先夠票數，我嗰陣時真係諗咗如果唔夠票點算。
而家諗返起當時嘅一切，都覺得係如此難得，遭遇左多年不遇嘅疫情，亦都令到我哋嘅應變能力好咗好多，知道轉咗做online就即刻有莊員提出我哋要拋棄過去所有嘅策略，重新諗過，唔好浪費時間，我覺得呢樣先係我哋真正學到嘅嘢。
Alexi
Position: Human Resourses Secretary
當未轉做Online Pro P嘅時我同莊員會係common加班到凌晨兩三點，跟住一齊去大埔仔餐廳買宵夜，係一段好好嘅回憶，因為可以體驗到大家一齊向一個目標奮鬥時嘅熱誠同專注。
轉咗做Online Pro P，之後雖然我哋有迷惘左一段時間，因為之前嘅功夫好似白費咗，有啲失望同埋唔知要點做，因為第一次Online Pro P，但係我哋好快又重整左士氣，一齊傾新方案，用唔同嘅方式去宣傳自己，用有趣嘅方式同會員互動，都落咗唔少嘅功夫。記得我畫嘅小劇場，雖然會有啲辛苦，但係係做緊我鍾意做嘅嘢，雖然有要改進嘅地方，但都會聽到正面嘅評價，所以我覺得係值得嘅，喺同會員互動嘅同時，我哋亦都會藉住呢個機會放鬆吓，出去玩。就好似我哋嘅唔同地區一日遊咁，去玩嘅同時會做啲唔同嘅challenges，俾會員睇多啲了解我哋，一舉兩得。
雖然成個Pro P一個月咁長，但而家諗返起又好似好快過，好短時間咁，有啲懷念。
Harley
Position: Welfare and General Secretary
Pro P期間我地每個人都負責整各自既遊戲,有拋圈套樽,有拋彩虹,仲有彈珠台！不過有d可惜既系無佢地出場既機會,但係系呢段製作期間,大家每日都一齊做野一齊夜瞓,有時候半夜兩三點肚餓就一班人行去買宵夜食,的確系幾開心既一段回憶。
後來Pro P改做online版,各種宣傳都只可以用FB同IG黎同大家接觸,對於呢個改動我覺得都係面對面既交流會有趣得多！期間我地都有各種唔同既活動,例如系IG問答,小劇場,lucky draw等等,不過最令我印象深刻既就係IG限時動態既Followers decide my day。根據大家投票結果決定當日行程,例如系午餐食咩,邊個食豉油豆腐花,做咩體能等等,實在系十分有趣同充實既活動。
Pro P呢段日子,話長唔長,話短唔短,但係可以同一班莊員一齊做野一齊挽,我覺得系開心滿足既！
Double
Position: General Secretary
未上莊之前一直以為Pro P系一個好輕鬆嘅環節，但其實好辛苦。 1月尾就要陸續返去科大整理物資同設計Pro P會用到嘅物品，例如小遊戲，裝飾物等等。仲記得我比其他人遲左兩日開始做野，但係工作進度已經完全跟唔上，而我自己負責項目系設計方面忽略左好多細節，導致我一開頭完全唔知應該點樣做。好彩其他莊員知道我有困難時，都立即放低手頭上的工作幫我揾工具又或者比建議。我相信如果冇佢地，我負責的遊戲一定完成唔到。雖然過程中好辛苦，經常要留至深夜趕工，但系亦都增進左我地之間嘅感情，互相加深認識。
就當我地工作差不多完成時，竟然因為疫情關係而改為online Pro P，而我地亦都立即開會商討要點樣系網上令更多人認識我地。幸運地，經過無數次嘅網上活動，總算令更多人加深左對spectrum的認識。
雖然一開始親手設計嘅遊戲，最後唔能夠系大家面前展示，係十分可惜同無奈嘅事，但實際上從短短1個月我已經獲益良多，唔單止學識好多以前唔會接觸嘅事物，仲識咗一班好nice的莊員，係各種意義上都感到好充實。